访问丨李茵彤Desta澄清Plan V首支派台歌並非賀年歌 爆樂小姐客串MV一Take搞掂 談《魔音女團》最驚嚇畫面.憑住主持音樂節目《唱錢》人氣急升的李茵彤（Desta），近期雙線發展順風順水，除咗主持工作漸入佳境，仲以組合Plan V推出首支派台歌，正式進軍樂壇。近日李茵彤受訪，大方分享做主持的點滴得着，親自澄清坊間對新歌的誤解，仲大爆樂小姐驚喜客串MV的幕後趣事，同時談及近期熱播的選秀節目《魔音女團》，分享最令佢印象深刻的表演畫面。
講起加入《唱錢》擔任主持半年的感受，李茵彤笑言至今都覺得成件事好似係一個夢幻泡泡：「由出道到而家，我從來都冇做過正式的主持，甚至從來冇諗過自己會向呢個方向發展，所以呢半年對我來講，真係好夢幻、好開心，仲可以同大哥同Eric Sir兩位前輩合作，簡直夫復何求，我超級開心。」
佢坦言，兩位前輩不時會講冷笑話搞氣氛，拍攝全程都相當輕鬆歡樂，自己一開始都會驚接唔住前輩的gag，不過就算一時反應唔過來，前輩都會俾空間自己，完全唔會施壓。講到做主持最大的得着，佢就話除咗學識要對實鏡頭同觀眾直接交流，唔係只淨係同對手講嘢，仲學識點樣順住節奏，流暢之餘又帶到好玩氣氛，最感恩節目俾咗好多空間自己發揮，唔使硬係死背所有台詞。
李茵彤仲大讚兩位前輩相當照顧新人，由頭到尾都冇鬧過自己半句。佢憶述，頭一、二集拍攝的時候，因為大哥轉數太快、Eric Sir滿腦子都是專業音樂知識，自己一度完全插唔到嘴，成日都係啞啞哋的狀態。但兩位前輩全程都好有心，就算鏡頭影唔到的位置，大哥都會用眼神提示自己「到你講啦」，仲會主動帶話題俾機會自己發揮，呢點令佢一直都非常感恩。
講起組合Plan V推出的首支派台歌《Fat Fat Fat Toy》，李茵彤坦言整首歌由作曲填詞、編曲到拍攝MV，整個過程都相當迅速：「成件事真係好快就完成，我哋的理念就係機會來到就即刻把握，有作品就一定要出，唔好等，唔趁年輕去做，仲等幾時？」
不過針對坊間普遍將呢首歌定義為賀年歌，李茵彤就親自出面澄清：「雖然首歌係新年期間推出，但我哋原本的用意，係希望呢首歌全年都啱聽，帶俾大家全年都順順利利、開開心心的感覺。不過都冇所謂，大家當佢係賀年歌都OK，希望每年新年都可以播多次，俾大家多一個新選擇。」
佢仲話，自己會不時刷新留言，睇晒網友的所有評論，無論係讚定彈都會盡量回覆：「我覺得每一個對我的留意、意見，無論係讚揚定批評，都係俾咗我關注，我做呢啲作品，本來就係希望俾更多人睇到，所以真係好多謝大家。」佢笑言，大家對自己都相當仁慈，暫時都冇收到好傷人的負面留言，非常多謝網友的支持。
講到MV仲請到樂小姐驚喜客串，李茵彤笑言呢件事對佢哋全組來講，都係莫大的榮幸，仲大爆邀請樂小姐的全過程：「呢件事真係臨時起意的，當時我哋一班人一齊食盤菜，大家食得好開心，仲飲咗兩杯，組合入面的男仔就膽粗粗走去同樂小姐傾計，順口邀請佢客串我哋的MV，點知樂小姐一口就應承咗，再加上我哋一齊推波助瀾，最後樂小姐就真係出現係我哋MV入面。」
佢大爆，樂小姐拍攝的時候氣場超強，雖然只有短短一個鏡頭，但佢哋全組人事前已經彩排咗無數次，務求令樂小姐可以一Take過完成，唔使浪費佢時間。最後樂小姐真係一拍就過，零NG零重拍，專業程度令全組人都非常佩服。被問到下一首作品會唔會再邀請其他高層客串，佢就笑言，最實際的都係快啲出下一首歌，今年都會保持創作狀態，唔會停下腳步，繼續用打不死的精神做音樂。
講到近期熱播、話題十足的選秀節目《魔音女團》，李茵彤就話自己有係社交媒體睇過唔少節目片段。被問到邊位參賽者的表演最令佢驚嚇難忘，佢就直言係Gino的演出：「我真係冇諗過大家可以咁放膽，毫無保留咁展現自己呢一面。講真，呢首歌其實真係一啲都唔易唱，所以我覺得佢哋真係好厲害，一班美女可以完全唔顧形象去演繹，我真係好佩服。」佢仲笑言，聽到Gino的演繹，完全冇諗過佢的音可以飛得咁遠，實在太厲害。
最後，佢話見到今屆星秀出身的Angel等一班後輩參加節目，都覺得好感觸，話佢哋剛剛完成一個比賽，又馬上挑戰下一個選秀節目，相當有勇氣。佢亦都藉此為一班參賽的後輩加油，希望佢哋可以繼續努力，搵到更好、更適合自己的舞台。TVB
