農曆新年將至，又是辦年貨的好時候，藝人莊思敏與莊思明兩姊妹就選擇到上環選購海味預備團年飯，提到過年習俗，思敏表示最重要是一家人開開心心吃團年飯和開年飯：「食乜冇緊要，最緊要一家人齊齊整整！」思明則表示若回馬來西亞就一定要吃「撈起」，寓意大家愈撈愈好、風生水起，問到二人會否入廚幫忙？思敏笑言不會「阻住個廚房」，思明亦搞笑説：「都想幫手，但都希望嗰餐飯大家食得開心啲，最好就唔好搞，哈哈！」
回顧過去一年，問到二人對自己蛇年成績，思敏説：「平平穩穩，覺得畀自己80分，起碼試過唔同嘢，拍短劇、短視頻拍咗唔同嘢。」思明則給予自己70、80分：「最緊要健健康康平安過渡咗一年，雖然中間有小毛病，但小病是福，都OK啦！（新一年展望？）希望自己繼續健康平安、順順利利，Keep住做《愛．回家》開心度過。（想拍其他劇？試不同角色？）都要等公司安排，想做黐線、奸嘅，因一路畀人好斯文。（你唔係咩？）我唔係，我都癡癡哋嘅，哈哈！」至於思敏亦希望作不同嘗試：「《愛．回家》都係一個好選擇，好想經過入去《愛．回家》度發展一下，因為見到佢哋好熱鬧！」思明即表示自己角色的媽媽還未出現過，笑言姊姊可以一試，思敏即説：「我自薦做佢媽媽！（接受到？）我咩都接受到，做阿婆都得！哈哈！」
談到思敏新婚不久，問到跟老公過第一個農曆新年是否要跟隨夫家的新年習俗？她指老公家人開明，沒有特別習俗、複雜傳統：「最緊要都係一家人齊齊整整食飯，今年多咗樣嘢要派利是，派雙封，準備好利是封，哈哈！」她表示今年會回馬來西亞過年，笑指不少好友已「命令」她不論去多久，回來也一定要派利是，問到利是內的餡料由老公負責？她笑言也會幫忙「唱錢」。問到思明何時跟男友楊明拉埋天窗派雙封利是？她笑言每年也是同一句：「都係盡快啦，我都答到好悶。（有冇計劃？）每年都會傾，始終可能佢有佢諗法，覺得佢好想自己覺得事業上好啲先，想成件事體面啲，其實佢諗嘢仲複雜過我，我覺得佢有陣時諗得太多，佢會話『唉吔你唔好理我啦，我就係想咁樣！』咁我話你繼續想啦，我反而冇諗得咁仔細，始終佢係男仔、福建人，可能諗嘢傳統啲。」思敏則表示不時會代入媽媽角色追問妹妹婚期，咁到她何時生B成為真正做媽媽？她坦言未必會：「唔想為害人間，哈哈！依家個世界要面對好多嘢，生個小朋友責任好大，現階段我冇信心處理到佢平穩嘅人生。」
