加邦一勝難求！救贖一戰，已經提前出局嘅加邦希望用勝仗挽回一絲顏面，好歹世外賽佢哋嘅表現都可圈可點。不過就事與願違，上下半場前半段都有唔錯表現，特別係上半場頭30分鐘嘅佢哋，都係喺後半段跌車，防守端企位同腳步未能跟上較為明顯。而後備入替嘅盧菲路（Clech Loufilou）換邊後錯失黃金機會對加邦都幾傷下。科特迪瓦最終獲勝，整場控制力高於對手係關鍵。相當活躍嘅奧拉爾（Christ Inao Oulaï）獲選MOM都實至名歸，串連同關鍵傳球都係最出色嘅一位。莫桑比克嘅拿迪富（Stanley Ratifo）同卡達莫（Geny Catamo）利用速度對喀麥隆嘅衝擊構成極大威脅，後者喺上半場嘅入波亦都為球隊取得領先。不過後防嘅問題就令球隊嘅功虧一簣，先有莊尼（Feliciano Jone）解圍變烏龍，再有卡利拿（Diogo Calila）換邊後送大禮，造就高芬尼（Christian Kofane）靚到爆嘅遠射。若果佢哋想喺淘汰賽更進一步，防線問題肯定要落多幾錢肉緊。喀麥隆呢場波贏得都算幾有運仔，以目前嘅狀態十六強面對南非會幾艱難。阿爾及利亞喺E組嘅優勢都幾明顯，係自尼日利亞後第二支三戰全勝出線嘅球隊。赤道幾內亞嘅事件都幾令人驚訝，涉事嘅球員同教練（有份辱罵球證）都面臨唔同程度嘅禁賽。非洲國家盃分組賽第三比賽日賽事賽果（E & F組）-Group E赤道幾內亞🇬🇶1-3 🇩🇿阿爾及利亞**蘇丹🇸🇩0-2 🇧🇫布基納法索*Group F加邦🇬🇦2-3 🇨🇮科特迪瓦**莫桑比克🇲🇿1-2 🇨🇲喀麥隆* 🌍⚽️🏆🇲🇦帶*為已經出線球隊
