羅馬球會向市政府提交位於 Pietralata 嘅新球場嘅技術經濟可行性研究報告。相關方案顯示喺最終設計階段之前，經過深入研究、並着重可持續性，同擁有清晰嘅願景，期望為羅馬呢座城市同球迷建立一座同歷史、熱情同未來匹配嘅球場。方案當中新球場包括：一座宏偉嘅南看台，將會係歐洲最大嘅看台，並且成為整個球場設計嘅心臟，亦係球迷激情嘅象徵。標誌性嘅建築設計靈感來自羅馬市嘅傳統，並且融合咗現代化嘅線條，同當地環境緊密相連。現代化嘅多功能空間，希望令球迷係比賽日之外都能夠體驗到球會嘅魅力。一系列改善交通、服務、環境持續性同城市融合嘅設計，目標令球場成為羅馬體育同社交圈子嘅中心。羅馬球會向市長古亞迪耶利特別表達謝意，感謝佢嘅支持、盡心盡力同持續合作，亦多謝羅馬市政府、地方當局同相關持份者嘅共同努力，亦引證出球會致力為羅馬建造一座現代化、環境可持續並且經濟效益顯著嘅球場嘅決心。規劃令到球場有機會被列入2032年歐洲國家盃主辦嘅場地之一。不過方案提交之後，跟住落嚟嘅流程仍然係漫長同複雜，首先第一個關鍵步驟會喺市議會進行，相關議會需要確認呢個項目符合公眾利益，並審視之前被要求達到嘅規定有被納入計劃當中，順利嘅話就會進行辯論同投票。然後就會進入決策程序，會由地區或者潛在嘅2032年歐洲國家盃體育專員負責，若果獲得認可，球會就可以申請建築許可證。
