陳曉華唱反調撐郭晉安攞視帝 男配3票都唔投朱敏瀚.兩位首次入圍十強的準視后陳曉華及傅嘉莉今日（15日）於記者會後同時受訪。對於外界睇好《金式森林》拍檔羅子溢奪視帝，陳曉華即搞笑唱反調說：「宣傳時大家都好鼓勵子溢攞獎，我就問佢哋係咪當我老公（指郭晉安）流㗎？我點都支持安哥，佢應該係羅子溢最大嘅勁敵，拍完套劇大家都好愛呢個爸爸，好有一家人嘅感覺，好彩我哋角逐提名『成家』都冇乜衝突，所有獎項都可以分別投畀我哋家庭成員。（「最佳男配」投畀《奔跑吧！勇敢的女人們》朱敏瀚？）唔會，男配三票投畀《金》劇嘅徐榮、羅天宇，同我有份拍《新聞女王2》嘅何廣沛。（唔驚朱敏瀚嬲？）我驚戲中啲仔嬲多啲！」兩人又不約而同指今次視后對手很強，陳曉華更分析道：「位位入圍嘅劇種都好唔同，如果想要破碎咁嘅咪揀我哋兩個囉，女強人代表就係佘詩曼同宣萱，想型嘅就會揀劉佩玥！（冇咗馬來西亞方面嘅獎項，咪少咗得獎機會囉。）一定係，一定要努力拉票，最尾如果《金式森林》攞到最佳劇集嘅話，都已經達到咗我嘅目標喇。」傅嘉莉則指《刑偵12》拍檔張振朗去年已橫掃兩個視帝大獎，故今年她會瞓身支持同劇林保怡：「佢係一個非常之好嘅前輩，我對佢非常之有信心。（頭先妳喺台上講咁耐謝辭，係咪諗緊頒獎禮當晚上台機會唔大？）係㗎，如果當晚入到五強有條籤喺電視螢光幕，已經係最靚嘅畫面。（諗住只扮靚靚去參加派對？）係，係家已經諗緊造型，好多人覺得我着紅色好睇，但我發現黑色係攞視后嘅幸運顏色，嗰晚都可以爭取「最佳衣着」嘅。」TVB
