臥底嬌娃熱播有睇頭！張曦雯一集換9Look艷壓全場 羅毓儀摺櫈鬥古惑仔超識執生.TVB新劇《臥底嬌娃》先至播出4集，已經憑住四位風格各異的女主角成功引起網民關注，成為近期熱門劇集！2月26號播出的一集劇情超豐富，馬貫東飾演的潘奕風向黃子雄飾演的步青提出要組建卧底小隊，仲專登為張曦雯、羅毓儀、陳瀅飾演的三位女角設計個人考核任務，之後仲帶住佢哋去運動場做體能特訓，全程劇力全開，睇到觀眾直呼過癮。
張曦雯在劇中飾演行為心理學家沈佳琪，個角色不單止聰明絕頂，識得透過人的微表情一眼看穿謊言，仲幫警方破咗唔少案，加上富二代的身份，劇入面隨時換靚衫，將佢嘅模特兒身形展露無遺，睇到網民Like爆！今集佢更上演「時裝秀」，一集換足9套造型，套套都養眼十足，有西裝短裙的斯文幹練Look，亦有貼地的家居眼鏡Look，最吸睛嘅仲係兔女郎造型，黑色Tube dress配黑絲上陣，大騷白滑香肩同修長美腿，弗爆身材直接養眼度爆燈！
劇情入面，沈佳琪仲憑住過人嘅推理能力，一早估中潘奕風的考核約見地點，不過面對潘奕風的卧底邀請，佢就相當有性格，直接拒絕話：「我問過我表妹點解你咁想做警察，佢話要伸張正義，但從我懂事以嚟，我冇遇過任何唔公平嘅對待，所以冇你哋口中嘅正義感。」聰明又有態度的表現圈粉無數，網民都紛紛大讚張曦雯係「行走的衣架」，乜嘢造型都可以完美carry！
另一邊廂，羅毓儀飾演的童小茹今集迎來首次卧底任務，化身保健品推銷員入到一間龍蛇混集的單位，點知一入去就被一班古惑佬圍住，仲唔俾佢走，嚇到小茹即刻衝去洗手間想逃走，奈何無路可走。情急之下，佢拎起被稱為「十大武器之首」的摺櫈狂打其中一位古惑仔，最終警方及時趕到先至化險為夷，呢個臨危不亂、識得執生的表現，獲得網民一大波讚好！
羅毓儀接受訪問時就話，今次係自己第一次拍攻擊人的動作戲，睇到劇本果陣超級期待，「好彩嗰個對手係我訓練班的同學，因為拍動作戲時都會驚整到大家，但我哋之前有合作過，所以我會放膽啲去做，好多謝佢信任我。」佢仲大爆劇中的摺櫈其實係道具組整的假摺櫈，「打落去會比較軟身唔會咁痛，做得好逼真，我最驚拍嘅時候用錯咗真摺櫈，好彩冇發生。」不過唯一美中不足的，就係拍呢場戲時佢病咗失聲，之後需要後期配音，令佢覺得少咗啲真實感。
除咗個人考核，潘奕風仲帶住沈佳琪、江妙姿、童小茹去運動場做體能特訓，三人又要跑步又要做Sit-up，訓練過程相當辛苦。羅毓儀就透露，呢場特訓戲的拍攝過程一樣唔易，「由朝早5點拍，拍咗成個朝早，加上嗰日天氣好熱，場地又無遮無擋，我哋都曬咗好耐，仲要就唔同機位，跑步都跑咗10幾次。」不過因為角色本身超級熱血，一心想做卧底，所以佢拍嘅時候都特別落力，力求做到夠敏捷、跑得快，雖然過程辛苦，但佢直言拍得好開心。
而飾演潘奕風的馬貫東，亦喺社交平台分享咗劇集的幕後花絮照，相中佢同張曦雯、羅毓儀擺出各款甫士，仲親自操刀為二人影相，張曦雯喺花絮照入面繼續大騷美腿，狀態超級好。其中一張相，馬貫東拎住小風扇貼心吹住陳瀅，細節位超暖心！佢更配文調侃：「其實你哋係做體能訓練定係打卡影相？」呢句趣味說話引來網民熱烈互動，大家紛紛留言話「兩者無衝突，打完卡再做體能訓練」、「女仔梗係鍾意打卡啦」，幕後的歡樂氛圍，都讓觀眾對之後的劇情更加期待！
TVB
