【On.cc】陳山聰賀歲片首映獻鼓技 承諾票房報捷扮兔女郎
視帝陳山聰、梁烈唯（唯唯）和林盛斌（Bob）等，昨晚於馬來西亞出席賀歲片《媽媽，又要嫁﹗》首映禮，吸引大批粉絲現場追星，場面墟冚。3子以賀年服登場，向現場觀眾拜早年，而首映儀式上，山聰更一展鼓技，率領舞獅團隊在場贈興，成全場焦點，他受訪時笑說：「我搵咗馬來西亞獅兄弟仗義幫忙，安排咗一條大龍同三隻醒獅表演，我就負責打鼓，正所謂鼓聲一響、黃金萬両嘛，攞個意頭囉。我哋等咗咁耐先有套賀歲片，梗係要做番個聲勢啦，好彩氣氛都唔錯。」
而首映禮足足安排了13間放映院，全部座無虛席，山聰說：「都未正式賣飛，當晚都只係招呼啲老闆及贊助商等等，而我哋就跑足13間院謝票，最後坐低同觀眾一齊睇戲，大家反應好好，可以講笑聲不斷，坐我隔籬嘅Bob話自己流咗滴眼淚喎，但始終未見真章，要等大年初一正式上映先知票房走勢。」
山聰日前接受當地記者訪問，自爆拍攝期間獻出了「初咬」：「為藝術犧牲㗎，哈哈！其實嗰場戲都唔知要點收科，惟有咬Bob個屁股啦，但就算真係拉低佢條褲，相信佢都唔會介意嘅。」Bob即扮嬲回應：「你哋都唔知諗乜，突然除我條褲同咬我屁股，好變態﹗其實如果觀眾睇咗會笑，要我做乜都冇所謂啦。」他更趁機許下承諾，只要票房報捷的話，他不介意穿戲中的兔女郎裝，在當地商場跑一圈謝票。
新片首映，幾咁墟冚！
陳山聰好受歡迎。
山聰同唯唯望票房大賣！
山聰大獻鼓技。
同大家揮揮手。
山聽、唯唯同Bob領軍。
山聰最後會唔會扮兔女郎？
