【On.cc】范明熙搵何晉樂做MV男主被鬧 澄清冇整容：係遺傳
無綫處境劇《愛．回家之開心速遞》中的飾演三房兒子龍舟（阿Joe）的何晉樂（Rock）擔任歌手范明熙（小V）全新單曲《我們的完結篇》的MV男主角，兩人首次合作便擦出火花，當中有不少親密鏡頭，而小V日前接受訪問時，多謝Rock自薦演出說：「其實個MV男主角係諗住搵同樣拍《愛．回家》嘅吳偉豪（Ricco），因為佢爸爸Bill叔叔（吳大強）係我姨丈嘅朋友，我家人成日都同Bill叔叔食飯同唱k，所以同佢成家人都熟，可惜Ricco夾唔到期，好在Rock自薦話可以幫我拍MV。（同Rock點解熟？）因為我哋成日一齊Busking。」
范明熙全新單曲MV有爭議。
何晉樂做MV男主角。
原本係想搵吳偉豪做男主，可惜檔期唔夾。
小V指MV是她上一段情的寫照，雖然屬內向的I人性格，但一「入坑」就是全情投入的「戀愛腦」，她謂：「同前度拍拖兩年，佢係年紀細過我嘅圈外人，但初初佢追我時好甜蜜，我成日黐住佢，但日子耐咗，佢可能覺得冇咗新鮮感，感情就轉淡。」現時單身的她，被問到Rock是否其「理想型男友」？她大讚Rock唱歌好聽、有才華，且跟他很夾，自爆：「我哋因為熟，所以乜都唔怕講，好似拍MV時，佢畀咗好多意見我，仲搞到有啲拗撬，不過佢真係好好，但我哋仲係朋友階段。」又指因MV的情侶CP太深刻，惹來部分疑似Rock粉絲不滿，在網上留言：「乜你哋未分手咩？」更有激進粉絲留狠話。問可介意被網民攻擊，她就話：「我最擔心係呢啲唔好嘅留言影響咗我首歌，因為我真係用咗好多心血同錢去做呢道歌。」
小V除和Rock的「友達以上」關係成網民熱話外，其筆直鼻樑及V煞下巴亦是另一焦點，她否認整容，聲稱只是化妝技巧效果，她謂：「我花最多錢買嘅就係化妝品，我覺得自己個鼻好大，所以就化細啲，而個下巴就係天生，我阿媽同阿姨都係咁，反而我就遺傳唔到佢哋嘅原子彈身材，我好細個就開始做美容療程，最想整細面上嘅蘋果肌。（你同傅穎，現名為傅寶誼撞樣喎？）係呀，我都聽聞過，之前有人話我有啲似岑麗香。」
何晉樂同范明熙被指MV中表現太親密。
惹來部分疑似何晉樂粉絲不滿。
范明熙話有人指佢似岑麗香。
最多人講佢似傅穎。
大家點睇？
